• FACE of HONG KONG

【支持年輕人追夢】劉天蘭疫情下現身撐細姪女 李昭南為慈善墊支六位數

【支持年輕人追夢】劉天蘭疫情下現身撐細姪女 李昭南為慈善墊支六位數

蘋果日報 更新時間 (HKT): 2020.09.01 19:04

「亞洲模特盛典Face of Hong Kong 2020香港賽區總決賽」於9月6日在網上直播舉行,20位參賽者今日現身鰂魚涌,勝出3位會再晉身韓國舉辦賽事,對撼來自亞洲參賽者。負責籌辦之一的ViuTV藝人李昭南母親和劉天蘭是中學同學,年少時常夾歌表演,友誼一直維繫至今,李昭南今次膽粗粗邀請Auntie出席活動,碌爆「人情咭兼Auntie咭」。


活動有慈善性質,在這個巿況下令李昭南有所壓力,更要墊支六位數字出錢又出力,劉天蘭笑言:「佢有請我飲水,支持世姪女,咁嘅情況下有年輕人參與,仲有年輕人去搞一個活動我好支持,知道特別艱難。」近月疫情嚴重,劉天蘭在家工作,少了上街,叮囑大家萬事小心做足清潔防備。




對於選Model準則,劉天蘭要求高:「睇條件、表現、肢體語言、氣質、裝扮、造型樣樣都有。」20位男女參賽者中年僅21歲11號陳志恆最強勢,與羅天宇撞樣,並即場大晒六舊腹肌:「好多人話我似羅天宇,當然佢靚仔啲,我塊面有啲肉地,但身上體脂好少,可能仲有baby fat。」有「翻版黃翠如」之稱的21號卓淑貞認為笑容予人感覺最似黃翠如。另外22號梁杏晴曾在日本出道兩年,主打唱日本歌,近年主力向模特兒發展。其中2號李展程和8號陳勇龍兩位曾參加《全民造星》。